Flintsmeden Morten Kutschera forklarer og demonstrerer korleis menneske i steinalderen og bronsealderen laga pilespissar, økser og andre odd- og eggreiskap av stein. Han vil fortelje om og vise ei rekke ulike teknikkar frå slutten av istida og fram til handverket døyr ut etter å ha nått eit høgdepunkt i bronsealderen.

Møt Romanifolket i ei ny vandreutstilling på Kystmuseet – ein minoritet som har levd i Noreg i 500 år. Dei som reiste, levde og handla langs kysten brukte ofte båtar – både som bolig og framkomstmiddel. Difor blir dei ofte kalt «dei båtreisande». Om folk har gjenstandar i huset som er kjøpte av eller stammar frå dei reisande, så er museet interessert i å låne desse i samband med utstillinga. Det same gjeld foto eller forteljingar som folk har lyst til å dele med oss. Vi oppmodar folk om å ta kontakt med museet. På denne måten kan folk hjelpe oss til å gje vandreutstillinga ei lokal vinkling.

Følg med på museet sine heimesider for meir informasjon.

Den tradisjonelle livsforma langs nordatlantiske kystar – fiskarbonde – har røter heilt tilbake til yngre steinalder. Denne livsforma omfattar både kystlandskapet, mentale og sosiale element i ein heilskap vi kan kalle fiskarbonden sitt sosiale rom. Kva endrar seg og kva blir halde ved like i eit tidsspenn frå midten av 19000-talet og til våre dagar?

Masterstudent i sosialantropologi, Harald Dyrkorn, vil fortelje meir om dette i foredraget. Dyrkorn er oppvaksen i fiskarbondemiljø på Nordøyane på Sunnmøre. Han er særskilt oppteken av sosiale endringsprosessar i kystsamfunn og arven frå fiskarbondesamfunnet.

Før i tida hadde fisk ein mykje større plass i kosthaldet enn no, både når det gjeld kor ofte ein åt fisk og til kva slags måltid gjennom dagen. Dette gjeld ikkje berre kystfolket, men òg dei som levde inne i landet. Før fryseteknologien blei tatt i bruk, først i produksjon og omsetning av fisk og etterkvart i heimane til folk, måtte fisken konserverast for å gjerast haldbar. Dette skjedde ved tørking, salting, røyking, raking eller ein kombinasjon av desse metodane. Det er hevda av fleire som har forska i maten si historie at folk føretrakk fisk som var konservert, sjølv der dei kunne hente fersk fisk frå havet. Dei likte best smaken av salt, surt, røykt eller speka.

Vi vil freiste å nyansere dette tilhøvet mellom bruk av fersk og konservert fisk, med fokus på tida rundt førre hundreårsskiftet. Kva slags fisk blei konservert og kva slags blei brukt fersk? Kva slags konserveringsmetodar nytta ein for å gjere fisken haldbar? Vidare vil vi utdjupe fisken si rolle i kosthaldet, både som kvardagsmat og til fest. Kor ofte åt ein fisk, til kva slags måltid gjennom dagen og kva slags fiskerettar vart nytta til fest og høgtid, t. d. som bryllaupsmat og til jul? Det vil også bli gitt døme på spesielle lokale matrettar laga av ulike fiskeslag og forskjellige deler av fisken, ikkje berre kjøtet, men òg innvollene. Mange av desse rettene er gått ut av bruk.

Vel møtt!